Йошкар-Оласе шыл комбинатыште – у линий…

Марий Эл Республикым вуйлатыше Л.Маркелов республикыште шылым переработатлыше ик эн кугу предприятийыш – «Йола» агрохолдингыш пурышо «Йошкар-Оласе шыл комбинат» ЗАО-шко – миен.

Тений шошым тушто производствым технически уэмдыме инвестиций проект илышыш шыҥдаралтын. Тиде 165 миллион теҥгешке шуын. Но тыште тидын дене серлаген огытыл. Предприятийыште уэмдыме паша умбакыже шуйна. Тушто производственный цех-влакым уэмдаш 162,5 миллион теҥгем кучылташ палемдыме.

Республик вуйлатыше ямде продукций цехыште лийын, шыл кочкышым вӱдылмӧ да автоматически пӱчкедыме линийым ончен лектын. Тудо, айдеме кид логалде, кочкышым тӱрлӧ кӱжгытын пӱчкеда.

— Республикын правительствыже мыланна эреак полшен шога, сандене ме кредитым налаш огына лӱд, — ойла Йошкар-Ола шыл комбинатын генеральный директоржо И.Косырева. – Ме кажне ийын выставкыш коштына, ончена, бизнес-планым ямдылена да кажне ийын предприятийлан мом-гынат уым налына.

У линийым Марий Эл Республикым вуйлатыше кӱкшын аклен. Шыл комбинат пашаеҥ-влак дене мутланымыж годым Л.Маркелов тысе производствын план почеш уэмдалт шогымыжым, кӱкшӧ качестван сатум лукташ да ассортиментым кумдаҥдаш йӧным ыштыше жаплан келшыше кӱкшӧ технологиян оборудований дене пойдаралтмыжым палемден.

— Предприятийыште кокла пашадар кажне ийын кушкеш. Холдинг республикын бюджетышкыже 500 миллион теҥге налогым тӱла. Но эн оҥайже: тудо шкенжын сырьеж дене пашам ышта, — манын Л.Маркелов.

Мутат уке, мийымыж годым тӱткышым поснак тыште ыштен лукмо сатун качествыжлан ойырен. Тудын сатужын молын деч чотак ойыртемалтмыж нерген вашлиймаште шукын ойлышт, вет «Йола» агрохолдингын шкенжын сӧсна комплексыштыже ончен куштымо вольыклан кӧра сай качестван шылым ыштен налеш.

Пашаче коллектив дене вашлиймыж годым Марий Эл Республикым вуйлатыше предприятий вуйлатыше-влакын пашаштым кӱкшын аклен. Республикын правительствыжын ончыкыжымат шыл комбинатым кумдаҥдаш да вияҥдаш полшаш шонымыж нерген ойлен.

«Йола» агрохолдингын президентше М.Цинпаевын ойлымыж почеш, 2002 ий гыч кугыжаныш полыш механизм дене пайдаланен, кредитын процент ставкыжым субсидироватлымылан кӧра «Йошкар-Оласе шыл комбинат» ЗАО производствым уэмдымашке виктаралтше кум инвестиций проектым илышыш шыҥдарен.

Йошкар-Оласе шыл комбинат кӱкшӧ качестван шыл консервым, колбасам да полуфабрикатым ыштыме шотышто Юл кундемыште ик эн ончыл верым налын шога. Тышеч элнан 64 кундемышкыже сатум колтат. А 1992 ий гыч Россий Федерацийын кугыжаныш резервышкыже шыл консервым колтен шога.

Марий Эл Республик Вуйлатышын мер кыл ден увер виктемже
Кусарымаш — Е.Садовин (газет «Марий Эл»)

Добавить комментарий