Тӱнян футбол дене 2018 ийыште лийшаш чемпионатшылан Москваште ямдылыме «Спартак» стадионын рӱдӧ фасадыштыже вераҥдыме 500 квадрат метр кумдыкан видеоэкраным Йошкар-Олаште ыштыме

Тидын нерген Марий Эл Республикым вуйлатыше Л.Маркеловын предприятийыш мийымыж годым «Ната-Инфо» ООО-н генеральный директоржо А.Шевкопляс ойлен.

Кызыт «Ната-Инфо» ООО федеральный шотан проектым илышыш шыҥдарымаште чолган тырша. Иктыже — Российын столицыштыже чоҥалтше саде «Спартак» стадион. Тиддеч посна марий предприятий Европысо, Китайысе да Японийысе партнер-влак дене пырля чолган пашам ышта.

Предприятийыште лиймыж годым Л.Маркелов производственный помещений-влакым, конструктор бюром, тусо сатум ончен лектын, пашаеҥ-влак дене мутланен.

— «Ната-Инфо» Российысе рынкыште кумдан палыме, но кызыт, вуйлатыше-влак ончылно у йодмашым шотыш налын, вес заводым чоҥаш задаче шындалтын, — палемден Марий Эл Республикым вуйлатыше Л.Маркелов. – Тыгай кӱкшытан производствым вияҥдыме республиклан моткочак кӱлеш, вет тудын деч пурышо налог республикнан социальный базыжым кугемдаш, спорт, медицине, образовательный учреждений-влакым чоҥаш да нуным у оборудований дене пойдараш полша.

Уремлаште вераҥдаш келыштарыме видеоэкранлам, уверым ончыкташ у электрон техникым шонен лукмо да ыштыме пашам «Ната-Инфо» ООО марий предприятий 1989 ийыштак тӱҥалын. Ты сферыште компаний Российыште вӱдышӧ предприятийлан шотлалтеш. «НАТА» маркан электрон таблом Российысе 100 утла олаште, Белоруссийыште, Украиныште, Казахстаныште, Литваште да Канадыште вераҥдыме.

Тений январь-июньышто гына предприятий 37 миллион теҥгеаш шке сатужым ужален. 17,5 миллион теҥге налогым тӱрлӧ кӱкшытан бюджетыш колтен. Тений чумыржо 210 миллион теҥгеаш сатум ужалаш да 30 миллион теҥге налогым тӱлаш палемден. Ты предприятийыште кокла пашадар кызыт 21,5 тӱжем теҥге гын, талук мучашлан тудо 27 тӱжем теҥге марте кушшаш. Тыгак компаний вуйлатыше-влак производствым вияҥдаш 5 миллион теҥгем кучылташ шонат.

Марий Эл Республик Вуйлатышын мер кыл ден увер виктемже
Кусарымаш — Е.Садовин (газет «Марий Эл»)

Добавить комментарий