Марий поэзий корнышто ошкылшо! | Татьяна Япаева

Tanya [Ляви Тачана] YapaevaМарий кундемна туныктышо, мурызо, тӱвыра аланыште тыршыше, журналист, оҥай вер-влак дене поян улеш. Марий кундемым чапландарымаште поэт да писатель-влакат шеҥгелан огыт код. Теве мутлан 1957-1987-ше ийласе марий литературышто Валентин Колумб, Вениамин Иванов, Геннадий Матюковский, Миклай Рыбаков, Валентин Косоротов, Зинаида Каткова, Константин Коршунов, Юрий Артамонов, Альбертина Иванова, Геннадий Алексеев, Вячеслав Абукаев-Эмгак, Валентина Изилянова да тулеч моло-влакат тыршеныт. А таче поэзий шӱлышан еҥ-влак улыт мо? Улыт. Поро жапда лийже «Марий поэзий корнышто ошкылшо!» сылнымут цикылнам умбакыже шуэна. Таче ме Татьяна Япаеван «Нимом шижде эртальыч пуйто…» почеламутыштым лудын лектына.

Нимом шижде эртальыч пуйто…
Пусмакыш шылын коштмо тат.
Лушташ ок пу шижмашнам ӱштӧ,
Кия окмак, шӱртеш пикталт.

Воштончыш шолып ӱштын тӱсшым,
Пустаҥше вер коштен шинчам.
Мылам гына ышта мо ӱчым,
Шарнен эрталше пагытнам?

Коеш тораште ӱмыр чӧгыт…
Азапым кораҥдаш шонен,
Пера шижмашым. Икыт, кокыт…
Ом керт мый тудым утарен…

Чонемже кушто? Тӧр вер-шӧрым
Кычал ок мошто кунамсек…
Шижмаш ок пӧртыл, колыш… Ӧрым,
Кузе чытен илен, каймек?

А вет вучен вашталтмым кечын,
Ик лукышто киен, окмак,
Нигуш тарваныде. Шеҥгечын,
Ойлат, толеш кугу титак…

Добавить комментарий