Марий поэзий корнышто ошкылшо! | Игорь Попов

Игорь - Yogor - ПоповМарий кундемна туныктышо, мурызо, тӱвыра аланыште тыршыше, журналист, оҥай вер-влак дене поян улеш. Марий кундемым чапландарымаште поэт да писатель-влакат шеҥгелан огыт код. Теве мутлан 1957-1987-ше ийласе марий литературышто Валентин Колумб, Вениамин Иванов, Геннадий Матюковский, Миклай Рыбаков, Валентин Косоротов, Зинаида Каткова, Константин Коршунов, Юрий Артамонов, Альбертина Иванова, Геннадий Алексеев, Вячеслав Абукаев-Эмгак, Валентина Изилянова да тулеч моло-влакат тыршеныт. А таче поэзий шӱлышан еҥ-влак улыт мо? Улыт. Поро жапда лийже «Марий поэзий корнышто ошкылшо!» сылнымут цикылнам умбакыже шуэна. Таче ме Игорь Поповын «Улына ваш-ваш теҥгече кече» почеламутыштым лудын лектына.

Улына ваш-ваш теҥгечсе кече.
Жап эртен, пырля жапна эртен.
Весе ден пайлет тый чон игечым,
Мыйын вачыш весе энертен.

Но садак мый, йӱдым помыжалтын,
Эр марте теҥгечсынам шонем.
Шӱм кыра шке верже гыч лекшашла,
Да иша ала-молан оҥем.

Тый дечет йодам мый иктым веле:
Ит тол омышкем тый так арам.
Чон шижмаш пушенге гычын веле
Шӧртньӧ тӱс, шарен лышташ орам.

Каена ме тӱрлӧ корно дене,
Тӱрлӧ шӱдыр мыланна чӱчка.
Ты тӱняште ынде омо веле
Угычын мемнам пырля уша.

Улына ваш-ваш тенгечсе кече.
Жап эртен, пырля жапна эртен.
Весе ден пайлет тый чон игечым,
Мыйын вачыш весе энертен.

Добавить комментарий