Мебельым ыштыше мошенник улмаш

Республикынан Параньга районыштыжо илыше-влак оксашт деч посна кодыныт. Нуно корпусан мебельым заказатленыт.

14 да 22 февральыште Параньга районысо ОВД-н дежурный частьышкыже верысе еҥ-влак йыҥгыртеныт, кудышт мошенник-шамычын кидышкышт логалыныт. Туткарыш логалше-влакын мутышт почеш, нуно корпусан мебельым ыштыше дене договорым ыштеныт, а мебельым тудо конден огыл.

Уверым тергыме годым рашемдыме: тидым Юл кундемын ик верыштыже илыше 43 ияш пӧръеҥ лийын. Тудо Параньга районыш шке «пашажым» ышташ толын. Верым айлен да корпусан мебельым ыштем манын, районысо газетыш уверым пуэн, тыге заказым поген. Договорым ыштыме годым ончылгоч тӯлымӧ нерген ойлен. Тыге кок ӯдырамаш тиддене келшен да кухньым заказатлен. Коктын пырляже 50 тӯжем теҥгем тӯленыт. Но договорым шукташ саде пӧръеҥ шоненат огыл. Заказын срокшо лишемме деч ончыч мошенник шылын каен. Ондалалтше заказчик-влак окса да мебель деч посна кодыныт, сандене милицийыш полышым йодын миеныт.

Ты факт почеш РФ УК-н 159-ше статьяж почеш уголовный делам тарватыме. Следствий кая.

mvd.gov12.ru

Добавить комментарий