Финн-угор тӱня кузе ила?

Пензыште А. Куприн лӱмеш тоштер мордва просветительын пашажым ончыктымо, тыгак тудын нерген ятыр брошюрым, статьям, книгам, чумырымо. Ончер 25 сентябрь марте шуйна. А теве 31 июль гыч 4 август марте Венгрийыште «Финноугория» II тӱнямбал фестиваль эртен. Тушко тӱрлӧ эл гыч ансамбль-влак погыненыт. 1 августышто Будапештыште финн-угор да самодий калык-влакын тӱвыраштым аралыме, вияҥдыме шотышто «йыргешке ӱстел» эртен. Вара артист-влак Печ, Балатонбоглар, Эгер, Дебрецент да Балатонфюред олалаште концертым ончыктеныт. Марий Эл гыч фестивальыш «Морко кундем» ден «Марий памаш» ансамбль-влак миен толыныт. Венгрийыште «Финноугория» фестиваль эртен гын, Надым оласе паркым (Ямал-Ненец АО) фонтан воктене 3D-пӱчӧ сӧрастара. «Ямальский колорит — в подарок району» проект почеш тошто да тӱсдымӧ зданий ден урем-влак «кокымшо илышым» налыт. «Граффити Арт» стадийын ӱдыр-рвезыже-влак уремлам калыкле тӱслан сӱрет дене сӧрастареныт. 1 июльышто «Российын аллейже» всероссийский акций увертаралтын. Элын чыла регионыштыжо интернет-йӱклымаш гоч шке ужар символ-влакым ойырат. А шыжым Крым Республикыште Российын аллейжым почыт. Тушто элын 85 регионын символжылан шотлалтше кушкыл-влакым шындат. Мордовийыште тачылан черешчатый тумо эн шуко йӱкым поген. Тиде кугу пушеҥгым вес семынже «Древо мира» маныт. Мордовийын символжым кумылан чыла еҥ ойырен кертеш. Йӱклымаш 31 август марте ruspriroda.ru сайтыште эрта.

Увер-влакым «Кугарня» газет негызеш ямдылыме

Добавить комментарий