Тауштем…

Володя Матвеев

Эр-эрдене тӱтырам вашлийым.
Тылзе тул йоммек, чашкер велен.
Ер-эҥерын йылгыжалтше шийым
Тул шинчам пычкемыштат кучен.

Тек улам ойгем ден ик тӱняште,
Чон сортам йӱлаш тырша тачат.
Трук волем гын, тул лиеш пурлаште,
А шолаште шун чонем мерча.

Шем тӱня тек агыже куаным –
Мый ом саке ойганен вуем.
Илыш-корныштем тамлем зияным –
Аралаш тылат, мотор суксем.

Шолып иленам ты ӱчылан мо?
«Вӱрлан –вӱр» манмаш ок шоч ушеш.
Кок сортам ушен, чонем муам гын,
Эн кугу пиал мылам лиеш.

Пыдалаш ом тырше пӱрымашым,
Юмо гай лияш кеч шоненам.
Чынлан ваштарешыже шогалше
Пиалан каваште лийынам.

Икте лач…Ал кече волгалтмеке,
Шун чонем кунам ырен чӱчка,
Тул ден вӱд коклаште шогымеке,
Ош мотор суксем полшаш вашка.

Добавить комментарий