Келшен омыл…

Володя Матвеев

Воктенетше лумла мый шулем,
Воктенет шомакемже йӱла,
Но тачат мые сайын палем:
Кумылет весылан йывырта.

Ала йышт вожылал шыргыжмем
Тыланет лийын огыл пӧлек?
Ала порын шинчам пӱалмем
Шӱмыштет шыде тулым чӱктен?

Ала кажне гана вашлиймек,
Ал пеледышым кондымемлан.
Йӧратем манын чоным почмек…
Ала ты оемлан сыренат?

Тек туге… Келшен омыл тылат,
Но лач иктым гына каласем –
Ӱмыреш садак шкетын кодат:
Тый от мошто йӧршеш йӧратен.

Добавить комментарий