Мӱй — чылалан пайдале!

14 августышто мӱй спас палемдалтеш. Ондак лач ты кече гыч мӱйым кочкаш тӱҥалыт. А тудо тазалыклан моткоч пайдале. Но мӱкшым ончымо паша куштылго огыл. Мӱкш пелен шкеат мӱкш гай лийман: омартам, рамым ситышын ямдылыман, карашан рамым аралаш верым ситарыман.
Калыкыште ойлат: «Мӱкш — «юмын кайык», мӱй — чыла чер деч эм». Чын, мӱкш лым лийде эре пашам ышта, ик пеледыш гыч весыш пырчын-пырчын нектарым поген чоҥештылеш. Шоналташ гын, ик изи совла мӱйлан мӱкшлан мыняр гана омарташ чоҥештылашыже логалеш? Шуко.
Мӱкш-влак тӱрлӧ верыште мӱйым погат тӱрлӧ таман мӱйым кочкаш лиеш, тугеже, мӱкш пеледыш гыч гына огыл мӱйым пога. Могай тӱрлӧ мӱӥ уло? Интернетышке ончаш пурышна. Чылажге, ныле кум тӱрлӧ мӱй сортым шотлышна. Мутлан: писте, акаций, гречке, эҥыж, барбарис, лопшудо, васильёк, тыкве, мелисе, мяте, пустырник, пызлегичке, мото, шалфей эсогыл кешыр мӱй-влакым тамлаш лиеш.
Специалист-влакын ойлымышт почеш, мӱйым изижланат-кугужланат кочман. Тудо вий-куатым да чонланат ласкалыкым пуа.  Мӱйын составше тыгай: фруктозо – 36 процент, глюкозо – 32 процент, сахарозо – 2 процент, мальтозо — 8 процент, вӱд – 20 процент. Углеводлан поян улмыжлан кӧра мӱй виян энергетический кочкышлан шотлалтеш.  Сандене, мӱй физический пашам ыштыше еҥ, спортсмен-влаклан пеш пайдале лиеш. Чайым йӱымо годым сакыр олмеш мӱйым кучылтмаш темлена. Тунам эре таза лийыда. Мӱйын качествыже мӱкш, пеледыш деч гына огыл шога, тыгак, мӱкшызӧ-влак шке сомылыштым сайын палалышаш улыт. Ме гын тыланда мӱйым кевытыште огыл, а пазарыште (южгунам тыштат мӱй сай лиеш), мӱкшызӧ-влак деч налаша темлена. Вет пытартыш жапыште, оксам шуко ыштен налаш манын, мӱй нерген тӱрлӧ шоя уверым кучылтыт.

Материалым ямдылыме годым «Кугарня» газетлан эҥертыме

Налме вер: «Кидшер»


Добавить комментарий