Финн-угор тӱня кузе ила?

«Ямалын кечыже» тыгай лӱман пайрем 19 июльышто Санкт-Петербургысо «Питер-Ямал» лагерьыште эртен. Уна-влакым автоном округын историйже, тӱвыраже да йӱлаж дене палдареныт. А кумылан-влак ненец да хант калык-влакын национальный костюмыштым чиен ончен кертыныт. Тидын годымак, театрализоватлыме представлений, мастер класс, этнический боди-арт лийыныт, национальный спортын тӱрлӧ видше дене тӱрлӧ таҥасымаш эртен.
«Пиалетым кычал , эргым». Тыге маналтеш Яков Егуров — Энсулын савыкталтше книгаже. Тушко романжым, кок повестьшым, ойлымаш-влакшым, шарнымаш да «Сусыр пеледыш» драмыжым пуртымо. Роман тыге тӱҥалеш: марлан кайыдыме ӱдыръеҥ сӧсна ферме воктене кушшо шӱкшудо коклаште кудалтен кодымо азам ашнаш налеш. Умбакыже мо лиеш — романым лудмо годым пален налыда. Яков Егоровын возымо йылмыже куштылго, поян, тӱҥдылде лудаш да шуко ум пален налаш лиеш.
8 августышто Ханты-Мансий оласе пӱртӱс да айдеме тоштерыште «Первый живописец народа ханты» ончер почылтеш. Экспозиций сӱретче Митрофан Тебетовлан 90 ий теммылан пӧлеклалтын. М. Тебетов — 400 утла сӱретын авторжо. Тудын пашаже-влак шуко тоштерыште аралалтыт.
Марий Элысе «Морко кундем» мурышо да куштышо ансамбль 1-10 августышто Венгрийыште эртаралтше «Финноугория» II тӱнямбал фестивальлан ямдылалтеш. Элын индеш олаштыже марий тӱвыра дене «Морко кундем» ансамбль палдараш тӱҥалеш. Кызыт «Морко кундем» ансамбльын участникше-влак фестивальлан кыртмен ямдылалтыт, кажне кечын репетиций эртат. А теве Пензыште А. Куприн лӱмеш тоштер мордва просветительын пашажым ончыктымо, тыгак тудын нерген ятыр брошюрым, статьям, книгам, чумырымо. Ончер 25 сентябрь марте шуйна.

Увер-влакым «Кугарня» газет негызеш ямдылыме

Добавить комментарий