Алык марла-англла лӹмдер сотым ужын!!!

Тагачы Вена университетӹштӹ йӓмдӹлӹмӹ алык марла-англла лӹмдерӹн презентацижӹ эртен. Изданим muter.mari-language.com ӹлӹштӓшӹш вӓрӓнгдӹмӹ, тӹдӹм цилӓн такешок, оксам тӱлӹде кычылт кердӹт, тӹдӹм пачаш интернет кӹл веле келеш. Лӹмдерӹштӹ цилӓжӹ 42561 тӹнг шамак улы, ти шамаквлӓ дон кӹлдӓлтшӹ пример шот 82742 дӓ фразеологизм шот 10749. Тенгелӓнлӓ тӹдӹ Российӹштӹ финн-угор йӹлмӹвлӓ гӹц англ йӹлмӹш сӓрӹмӹ лӹмдервлӓ логӹц сек когоэш шотлаш лиэш. Тӹлец пасна, кыце пӓленӓ, лӹмдернӓ гань кого шӹнгӹцӓн, тӓнгӓштӓрӓш гӹнь, Российӹштӹшӹ вес чӹдӹ шотан йӹлмӹ гӹц вескид йӹлмӹш сӓрӹмӹ, вес техень материал уке. Попашат уке, мары йӹлмӹвлӓ доно пӓшӓм ӹштӓш тӹнгӓлмӹнӓ годым, киднӓ лӹвӓлнӹ техень материал лиэш ылын ылгецӹ, пиш сусу линӓ ылын.

Лӹмдер Creative Commons лицензи доно лӓктӹн, седӹндоно ти материалым пӓшӓвлӓштӹдӓ кычылтмы годым лицензи правилывлӓ семӹнь лӹмдерӹн авторвлӓжӹн лӹмӹштӹм анжыктымыла, тенгежӹ материалым ирӹкӹн шӓрӓш лиэш дӓ лӹмдерӹм кычылташ каждыйын праважы улы.

Лӹмдер Австрин шанцылык (научный) фондын палшымыжы доно йӓмдӹлӓлтӹн: проектнӓм 2011-шӹ ин 1-шӹ январь гӹц тӹнгӓлӹннӓ дӓ пӓшӓнӓ кым и шыпшылтын. Тӹдӹн сирӹшӹвлӓжӹ Вена университетӹштӹшӹ финн-угор йӹлмӹвлӓм шӹмлӹмӓш кафедрын пӓшӓзӹвлӓжӹ Тимоти Ризе дон Джереми Брэдли (англ йӹлмӹ когыньыштынат туан йӹлмӹ ылеш) дӓ Мары кугижӓнӹш университетӹн тымдышыжы мары йӹлмӹзӹ Элина Гусева ылыт.

Лӹмдернӓн тӹнг цельжӹ — кӹзӹтшӹ алык мары литературный йӹлмӹм ӓвӓлтӹмӓш. Тӹнг шотышты изданим англ йӹлмӹлӓ шачмы йӹлмӹ семӹнь хытырышы, мары йӹлмӹвлӓ докы кымылангшы эдемвлӓ йӓмдӹленӹт, седӹндоно лӹмдерӹм цымырымашты сек пӹтӓриок ышыш нӓлмӹ англ йӹлмӹлӓ лыдшы аудиторим. Тенге гӹнят, пӓшӓнӓ мары халыкланат йӧнӓн ылеш манын ӹняненӓ. Шанымаштына, лӹмдернӓм мары йӹлмӹвлӓм тыменьшӹ вескид университетӹштӹшӹ студентвлӓ веле агыл, англ йӹлмӹм тыменьшӹ мары студентвлӓ дӓ школьниквлӓӓт кычылташ тӹнгӓлӹт.

Лӹмдер шукы йиш йӧнвлӓжӹ доно айыртемӹнок йӹлмӹзӹвлӓлӓн пайдаан ылеш — шамак толшеш, тӹдӹм анешлӓ англла-алык марла кычылташ лимӓш ӓль мары материалым транскрипци доно анжыктымаш йӧн (уральский ӓль интернациональный (УФА ӓль ТФА) фонетика алфавитвлӓ доно).

Йӹлмӹ соок вашталт миӓ, седӹндоно лексикографын пӓшӓжӹ пӹтӹдӹмӹ. Мӓ лӹмдернӓм цартакан анжен ӹштӓш цаценнӓ гӹнят, ӹлен-толын тухатат, акситӹвлӓ, йӹлмӹ вашталтымашвлӓ сойток каяш тӹнгӓлӹт лиэш. Кердмӹ семӹнь йӹлерӓк нинӹм тӧрлӓш манын, софтверӹшкӹнӓ мӹнгешлӓ-вӓшкӹл функцим пыртеннӓ. Сенге изданинӓм кычылтшывлӓ ӹшке темлӹмӓшӹштӹм, ма доно келшӹдӹмӹ шанымашыштым мӓ докына колтен кердӹт.

Кӹзӹтшӹ мӓгӓлеш лӹмдернӓ шукырак шотан алык мары литературный нормым веле ӓвӓлтӓ. Толшаш ивлӓн изданишкӹнӓ кырык мары литературный йӹлмӹ материалвлӓм пырташ манын пасна плагинӹм йӓмдӹленӓ. Уэмдӹмӹ издани Конэ Фондын палшымыжы доно ӹштӓлтеш лиэш дӓ 2017-шӹ ин публикуяш йӓмдӹ лишӓшлык лиэш.

Лӹмдернӓн презентацижӹ Йошкар-Олашты кӓнгӹжшӹ мары йӹлмӹ курсвлӓн рамкышты эртен. Йӹлмӹ курсвлӓштӹ вес сӓндӓлӹквлӓ гӹц толшы тыменьшӹвлӓ сага Вена гӹц Джереми Брэдли дӓ тӹдӹн студентвлӓжӹ ылыныт. Кӓнгӹж школышты тыменьшӹвлӓ алык марла-англла лӹмдерӹм кычылташ тӹнгӓлӹнӹт дӓ анзыкылажымат кычылташышты йӧн ӹнде улы.

Автор: Джереми Бредли

Добавить комментарий