Моско гыч шӧртньӧ медаль дене!

2013 ий декабрь – 2014 ий июль гутлаште Россий кӱкшытыштӧ «Моя страна – моя Родина» конкурс эртен. Тиде конкурсын тӱҥ шонымаше ялысе, селасе, оласе, регионысо неле йодыш-влакым решатлаш. Конкурсым Кугыжаныш Думо, РФ-ын Шинчымаш да шанче Министерстве да эше икмыняр ушем пырля эртареныт.
Икымше этап регион кӱкшытыштӧ эртен. Тыште Марий Элысе самырык еҥ-влак шке проектыштым организатор-влаклан колтылыныт. Ага (май) тылзе мучашыште иктешлымашым ыштеныт да Советский районысо, Ӱшнӱр кыдалаш школын «Чодырасе кудо», тыге маналтеш тунемше-влакын проектышт, сеҥыше радамышке лектыныт. Школын туныктышыжо  Елена Васильевна Кислякова 11- ше классыште тунемше Бирюкова Ольга ден Любимов Николайым, 10-шо классыште тунемше Михайлова Надежда ден Силина Кристинам проект пашалан кумылаҥден улмаш. 
«Чодырасе кудо» проект Ӱшнӱр селасе да Комсомольский посёлкышто канаш йӧршӧ шыныш. Лач тиде проект дене Ольга Бирюкова школын чапшым аралаш Москошко каен. Форумышто чылажге 300 утла тунемше ден студент-влак 52 тӱрлӧ регион гыч чумыргеныт. Форумын программыштыже проект-влак аралыме деч посна, тӱрлӧ эксперт дене вашлиймаш-влак, дискуссий да Москошто экскурсий эртеныт. Ольга командын проектшым лудын, арален тыге  «Моё село» номинацийыште икымше верышке лектын. Тудлан I-ше степенян дипломым, шӧртньӧ медальым да 60 тӱжем теҥге премийым пуэныт Каласен кодыман, конкурсышто Ольгам школын завучшо Елена Геннадьевна Муржакова эре кумылаҥден шоген.

Добавить комментарий