Пермь гыч чолга марий ӱдыр!

Ушештарем, Параньга районысо Олор школ пелен Россий кӱкшытан VI марий самырыктукым слёт эрта. Тушечын кажне кечын ме тыланда увер-влакым лудаш темена.
Икмыняр кече ончыч Марий Эл ТВ-ште Российысе марий самырыктукым слёт нерген репортажым ончыктеныт ыле. Тушто Пермь кундем гыч марий ӱдыр Айгуль Каландарова нергенат каласкалышт. Айгуль Каландарова нерген возена.
Айгульын аваже – марий, ачаже – узбек. Ӱдыр утларак коваж дене Арти районысо Изи Тавра марий ялыште кушкын. Садлан шкенжым марийлан шотла.
Тыгай слётыш ӱдыр кокымшо гана толын. Икымше гана Волжский районысо Сотнур школ пелен эртаралтше слётышко толын ыле.
Айгуль шанче пашалан школыштак кумылаҥын. Тӱрлӧ проектым возен. Конкурслаште участвоватлен.
Марий шӱлышан Айгуль курсовой пашажымат Изи Тавра ялын марий калыкше нерген возен. Тудын йӱлаже, тӱвыраж дене тичмаш палдараш тырша. Шуко информацийым коваж деч йодыштын. Тудын нерген А. Каландарова поро мут дене веле ойла. «Ковам Ольга Дмитриевна марий йӱлам пагалаш туныктен. Мутлан, омса лондем воктене шогаш ок йöрö. Чыла тидым ме шукташ тыршена, но кумалмаште огына участвоватле. Тыгак мелнам кӱэшташ, вольыкым ончаш (каза-влакым ашныме), коҥгаш олташ туныктен. Садлан ялыште шкетынат илен кертам, очыни», — ойла тудо.
Кузе шкеже палемда, Айгуль слётышто лидер койыш-шоктышыжым вияҥда, организатор пашалан, марла яндарын, сылнын мутланаш тунемеш.

Материалым ямдылаш «Арслан» сайт полшен!

Добавить комментарий