30 Пеледыш — Календарь!

Мо лийын?
1908 ий — Сибирь тайгашке Тунгус метеорит камвозын.
1936 ий — Йошкар-Оласе музык училищылан И.С. Ключников-Палантайын лӱмжым пуымо. Ончо: И.С. Ключников-Палантай лӱмеш тӱвыра да сымыктыш колледж
1941 ий — Воронеж оласе Коминтерн лӱмеш заводышто икымше «Катюша» сарзе машина-влакым ыштен лукмо.
1971 ий — «Союз -11» космический корабльын экипажше колен. 3 космонавтын: Георгий Добровольскийын, Владислав Волковын да Виктор Пацаевын лӱмыштым тылзын кратерже-влаклан да изи-планета-влаклан пуымо.

Кӧ шочын?
1881 — Агриппина Васильевна Боброва-Ишпайкина, палыме просветитель, марий ÿдырамаш-влак кокла икымше революционер. Провой кундем Какшамарий ялыште шочын. 1906-шо ийыште шке шочмо ялыштыже кресаньык бунтым тарватымыжлан тудым 3 ийлан ссылкыш колтеныт. 20-шо ийлаште Агриппина Васильевна туныктымо пашашке ушнен: поснак ӱдырамаш-влак коклаште грамотан лийышт манын тыршен.
1928 — Алла Николаевна Гзыло, театр сӱретче, Марий Эл сымыктышын сулло пашаеҥже. Свердловскысо, Пермь оласе да Брестысе театрлаште тыршыме деч вара Марий кугыжаныш драмтеатрыш толын. «Салика», «Кок эрге», «Марш Акпарса» спектакль-влакын оформительже. А «Фёдор Иванович кугыжа» спектакльланже Марий республикысе кугыжаныш премий дене палемдалтын.
1947 — Людмила Ивановна Кожевникова, партий пашаеҥ. Йошкар-Оласе комитетын секретарьже гыч тӱҥалын областьысе КПСС партий комитетын секретарьже марте шуын. 14 ий Марий республикысе кӱшыл погынын депутатше лийын.
1950 — Иван Фёдорович Васильев, экономист да кугыжаныш вуйлатыше. Лач тиде уста айдемын вуйлатымыже почеш Марий Элысе виктерын илышкыл да экономик лончылымаш рӱдер почылтын. Экономик вияҥмаш шотышто ятыр программа-влакын авторжо да вуйлатышыже. Экономик шанче кандидат.
Светлана Горохова, тӱвыра пашаеҥ, мурызо. Шкеже тудо Куженер район Кокшародо ял гыч. Шинчымашым тӱвыра да сымыктыш колледжыште поген, театр пӧлкам тунем лектын. Паша корныжо Советский посёлкысо тӱвыра пӧрт дене кылдалтын. 2011 ийыште Светлана шкеж гаяк муро кумылан еҥ-влакым шке йырже поген «Мурызо тукым» ансамбльым чумырен.
Лилия Петухова, мурызо. Шкеже тудо Морко вел Кожлаер гыч.

Калык пале…
Ты кечын кум изак-шолякым: Мануилым, Савелийым да Исмаилым шарналтат. Калык ой почеш, ты кечын мӧҥгыштак шинчыман. Тулым чӱктыман огыл, шем вий тулым ужын толеш – маныныт.

Добавить комментарий