Вор-влак телевизорым шолыштыт

Йошкар-Оласе УВД-н пашаеҥже-влак осал еҥ-влакым кученыт, кудышт рӱдоласе пачерла гыч телевизорым шолыштеденыт.

3 март йӱдым Волков уремысе ик пӧрт пачер гыч телевизорым шолыштыныт. Пачерыште илыше пенсионерка малаш возын, но омсажым тӱкылен огыл. Тыге вор шыпак телевизорым луктын наҥгаен. А эрдене ковалан йӱштӧ лийын да помыжалтын. Тудо почылтшо омсам ужын, а вара телевизор йоммым умылен. Мо лийме нерген вигак милицийыш увертарен. Йошкар-Оласе УВД-н уголовный розыскшын сотрудникше-влак осал шонышан еҥым пален налыныт. Тиде 38 ияш пошкудыжо лийын. Кучалтше телевизорым мый шолыштынам, ужаленам да туддене аракам налынам м анын. Ты факт почеш РФ УК-н 158-ше статьяж почеш («Кража») уголовный делам тарватыме. Следствий кая.

Тыгаяк ситуацийыш Йошкар Армий уремын пӧрт пачерыштыже илыше-влакат логалыныт. 4 мартыште 70 ияш пенсионерка да тудын эргыже кухньыштыт пудыгымо окна йӱкеш помыжалтыныт. Нунын пачерыш вор пурен улмаш. Тудо аптыранен шоген огыл, телевизорым налын да омса гычак тудым луктын. Писын милицийыш увертарыме дене патрульно-постовой службын пашаеҥже-влак ворым ты кечынак кученыт, а телевизорым озаштлан конден пуэныт. Ты факт почеш РФ УК-н 161-ше статьяж почеш — «Грабёж» — уголовный делам тарватыме. Следствий кая.

Марий Элысе Элкӧргӧ паша министерстве калыклан шижтара: пачерыш пурымо омсам пенгыдемдыза, сай кӧгӧнлан, решоткалан, балконысо омсалан, охранный сигнализацийлан оксам ида чамане. Тендан пачерыштыда вор лийын гын, вашкерак милицийыш шижтарыза. Милицийын номерже-влак: 02, 020 (моло абонентлан).

mvd.gov12.ru

Добавить комментарий