Кумда тӱня шочмо вер гыч тӱҥалеш!

Пытартыш лу-лучко ий жапыште калык у пайрем-влакым эртараш тӱҥалын. Шочмо ял пайрем тыште посна верым айла. Тыге 12 июньышто мотор пайрем Кужэҥер районысо Окашъялыште лие.

Республикысе марий тӱвыра рӱдерын тӱшка тӱвыра паша шотышто пӧлкаштыже тыршыше-влак Людмила Кошкина, Лариса Сидоркина, Галина Ласточкина тиде пайремым ямдылаш да эртараш полшеныт. Нунак программым ыштеныт, модыш-влакым вӱденыт.

Тиде кечын ялыште илыше да тышке унала толшо-влак вӱдышӧ-шамыч дене пырля шочмо кундемын историйжым, пагалыме еҥже-влакым шарналтеныт.

Таче кечылан Окашъялыште ик сурт-печат уке, но пайремыш шӱдӧ наре еҥ чумырген. Тидлан ӧрмӧ ок кӱл, вет шочмо вер-шӧр кажныланат эн лишыл да эн шерге лийын кодеш.

Ял пайремым марий эстрадын шӱдыржӧ-влак Лариса Сидоркина, Артур Ефремов, Вадим Краснов сӧрастареныт. Нуно погынышо калыклан пеш весела кумылым пӧлекленыт.

Мутат уке, тыгай пайрем чылаштымат чак лишемда, шке шочмо кундем дек шӱм шижмашым утларак ылыжта. Ме чылаштымат ты пайрем дене шокшын саламлена да эреак таза лияш, тӱзланен илаш тыланен кодына.

Геннадий Сабанцев кусарен.

Добавить комментарий