Стадион уэмдалтеш

Медведево поселкышто стадионым тӱрыс олмыкташ тӱҥалаш ямдылалтыт.
Ола сынан поселкын администрацийыштыже тыге умылтареныт: ты кугу спорт сооруженийым уэмден олмыктымаште 3,5 миллион утла теҥгем кучылташ палемдыме. Кызыт ты пашам шукташ кумылым ончыктышо организацийым ойырен налаш конкурсым увертарыме.
Строитель-шамычым изи огыл паша вуча. 32 квадрат метр кумдык куржталме корным пужен вакшман. Тыгак чумыржо 450 квадрат метр кумдыкышто калыкын шинчыме верым авырыше кӱ бортым, йӱр вӱдым колтышо волакым ыштыман, брусчаткым оптыман. Чоҥышо организаций дене контрактым ыштымеке, чумыр пашам кок тылзыште мучашлаш палемдалтеш.

«Марий Эл» газет

Добавить комментарий