Чумбылат курыкышто кумалтыш лиеш

Шке жапышыте тыгай тале еҥ-влк иленыт, кудышт марий коклаште пеш кугу пагалымашым суленыт: Юмо ончылно ару чонан улмышт денат, вашумылымашым шижын моштымышт денат. Шочмо калык верч чот шогеныт. Тале, виян, чулым, ушан-шотан улмышт тушман ваштарешат шогаш полшен. Курым гыч курымыш нунын лӱмышт Ю вийым поген. Нунын радамыштак – Курык Кугыза.
Курык Кугыза але Полемдрук – XI курымышто шаланен пытыше марий-влакым Чумбылат лӱман пӧръеҥ иктеш чумырен да ола-влакым чоҥаш тарватен. Тунам тудым йӱдвел Кугыжа семын паленыт. Тудын шийвундо поянлыкшат, сарзыжат, полышкалышыжат ятырак лийыныт. Кугу сӧйыш тарваныме деч ончыч, чонан дене Юмым сӧрвален, кумалтышым эртарен улмаш. Кӱсле йӱк ден Юмылан пелештыме мут-влак иктеш йоҥген, вийым ешареныт да кредалмаште сеҥымашыш шуктеныт. Тидлан кӧра Чумбылат Оным чот пагаленыт.
Вес тӱняшке кайымекше, кугу кӱ курыкеш курымешлан возын. Тиде верышке марий-влак толын кумалаш тӱҥалыныт, да таче мыланна Чумбылат Кугурак, Курык Кугыза, Полемдрук семын палыме.
Ятыр вере кумалтыш годым Курык Кугызалан посна тулолмо дене кумалыт. А Немда вӱд воктенысе кугу курык ӱмбалан Марий Юмын йӱла ушемын тӱҥ тамгажым вераҥденыт да отымат кажне ийын саемден шогат.
Чонлан йӧсӧ годым, илышыште шыгыремдалтме да азапыш логалме годым Курык Кугыза кийыме верышке кинде, солык, ший надыр дене миен толаш лиеш. Но шарныман, кумалме отышко шкевуя огыт пуро.
Курык Кугыза кийыме верыште кугу кӱ ӱмбаке поро шонымаш дене ший оксам пыштен кодат. Тыгак порым шонен, кӱ воктене шогышо кожеш тасмам кылдат. Вес ганат тиде верышке кумалаш толаш тазалыкат ситыше лийже, амалжат сай лийже маныт.
Курык Кугыза – марий калыкын аралтышыже. Тудын полшымыж дене мер пашаште, корнышто коштмаште, армийыште порысым шуктымаште, тазалыкым эскерымаште аралтышым, серлагышым, илыш вийым налына.
А теве 22 июньышто Киров кундем Советский район Чумбылат курыкышто кумалтыш лиеш. Шернур гыч кайыше-влакым Роно ваштареш площадь гыч автобус вучаш тӱҥалеш. Тудо 7 шагатлан тарвана.
Йошкар-Ола гыч кумылан-влак 89278775749 але 45-88-51 тел. дене йыҥгыртен возалт сеҥат. Автобус 7 шагатлан Гагарин проспект, 8 пӧрт воктеч тарвана.

Источник: Ираида Степанован «Кӱсото — Святая роща» книгаже.
Организатор-влак

 

Добавить комментарий