Йошкар-Олаште 100 литр наре спиртан йӱышым поген налме

3 мартыште Йошкар-Оласе вокзал воктенсе кумдыкышто рӯдоласе УВД-н экономика сынан осал паша ваштареш кучедалше-влак оперативно-разыскной мероприятийым эртарыме годым ик ужалыме верыште писын шолтымо кочкыш дене пырля аракам ужалымым рашемденыт. Тидыже лӱдыкшыдымылык йодмаш дене келшен ок тол. Поген налме вишкыде 98,5 литрыш шуын.

Суррогатым ужалымаш шукертак талышнен да йодмашат кугу улмаш. Кажне кечын тышак картон коробка дене аракам кондеденыт. Тушкыжо 5 литран ныл канистр пурен. Ужалкалыше йӱышым 0,5 литран да 0,25 литран кленчашке темкален. Пел литрлан 60 теҥгем тӯлыман, а «чекушкылан» — 30 теҥгем.

Вучыдымын толын лекше ОБЭП пашаҥ-влак ужалыме верыште канистр дене вич коробкам верештыныт. Тушто икмыняр коробкаштыже йӱышым кленчашке темкалыме улмаш. Ты кечын милиционер-влакын толмышт деч ончыч 3 кленча суррогатым ужален шуктымо улмаш. Но ик налше еҥ ОБЭП пашаеҥ-влакын ларёкым ончымышт годымак 5 литр спиртым ужалаш йодын.

Ужалыме парым нерген данный-влак «Химия» манын возымо тетрадеш возалтыныт. Кечеш 2-5 тӱжем теҥге лектын, а тылзеш 60 гыч 150 тӱжем теҥгеш шуын. Сай парыш, а продавецын кечеш пашадарже 300 теҥге наре лийын. Конешне, нимогай лицензий ден спиртан йӱышым ужалаш разрешений продавецын лийын огыл.

Поген налме йӱышым экспертизыш колтымо, тудын результатше почеш РФ УК-н 238-ше статья («Производство, хранение, перевозка либо сбыт товаров и продукции, выполнение работ или оказание услуг, не отвечающих требованиям безопасности») почеш уголовный делам тарватат.

mvd.gov12.ru

Добавить комментарий