Марий йылмым ныл тылзыште тунем шуаш лиеш мо?

Марий Кугыжаныш университет ден Удмурт Кугыжаныш университет ынде кумшо ий студент-влак дене алмашталтыт. Тиде гана Йошкар-Олашке 2-шо курсышто тунемше Марина Романова толын. Тудо тений пургыж тылзе гыч ага тылзе марте МарГУшто тунемын.
Марий йылмым ныл тылзыште тунем шуаш лиеш мо? Одо ӱдыр тидым ыштен кертын. 30-шо майыште чолга да чулым Мариналан МарГУшто тунеммыжлан калыкле тӱвыра да тӱвыра кокласе институтым вуйлатыше Родион Иванович Чузаев сертификатым кучыктыш. Родион Иванович самырык ӱдырлан институт илышыште участвоватлымыжлан таум каласыш, кугу кӱкшытыш шуаш тыланыш. Тиддеч вара Марина IV-ше курсышто тунемше-влаклан удмурт йылме урокым пуыш. Студент-влак фонетике ойыртем, тыгак лӱм мут, олмештыш мут, чот мут да глаголын кызытсе-шушаш жап дене палыме лийыч. Мый, Наташа Венина, марий да удмурт йылмылаште кучылталтме шомак-влак нерген мутым луктым. Мутлан, ме ик семын таум каласена.
Удмурт йылме урок оҥайын эртыш, «Италмас» мурымат тунем шуктымо.
Финн-угор йылме-влак тӱнямбал мучко кумдан палыме улыт. Жап шуын ала тылатат марий йылмым тунемаш!? Тый ямде улат?
Кумылан-влак марий йылмым www.lingua4you.ru сайтыште тунемын кертыт.

Автор: Наталья Венина.

Добавить комментарий