Ик теҥгелан шулдынрак кудалына

Оплата

Йошкар-Олаште троллейбуслаште 1 июнь гыч ты транспорт дене ик гана кудалаш акым ик теҥгелан шулдештарыме да 15 теҥгем ыштыме.

«Троллейбус транспорт» муниципальный предприятийын электровийым пуэн шогышо организаций ончылно парымже кугу улмым шотыш налде, кеҥеж пагытлан тыгай ошкылым ышташ кӱлешлан шотлен. Изи куан гынат, тидыжат калыклан оксам мыняр-гынат аныклаш полша. Билетлан акым шулдештарымым троллейбус парк директорын эксплуатаций шотышто алмаштышыже Ю.Гребешков тыге умылтарыш:

— Тидыже калыкым мемнан трнаспорт дене кудалаш мыняр-гынат кумылаҥден сеҥа. Тидым психологический ошкыл манынат кертына. Мемнан планово-экономический отделыште шотлен луктыныт: парк билетлан акым куд процентлан шулдештара гынат, лач тынарлан троллейбус дене кудалыштше пассажир-влак ешаралт кертыт. Кызыт рӱдола уремлам маршрутко-влак теменыт, автобус-шамыч палынак шагалемыныт. Пассажирым шупшыктышо «Газель»-влакын южо водительышт илалше, тыгак социальный проездной дене яра кудалыштше-влакым пагалыдымашым ончыктат. Нуныштын яра кудалаш правашт уло гынат, виеш оксам тӱлыктат. А мемнан транспорт эреак социальный лийын да тыгаяк кодын. Сандене троллейбус дене кудалаш пагален ӱжына.

Шкем утыждене ушанеш лукшо южо еҥ троллейбуслан социальный проездной билет акым ик гана кудалаш шотлымаште 20 теҥге марте ешараш темла. Кызытсе нужна саманыште тидым ышташ йӧн уке. «Троллейбус транспорт» муниципальный предприятий тыге парышыжым кугемден кертеш гынат, «Мариэнергосбыт» ОАО ончылно парымже кугу улмо ӱмбачак тидым ышташ тореш шога.

. Авторын фотожо.

Добавить комментарий