«Колумб лудмаш» конкурсыш ушно!

12 май марте «Колумб лудмаш» оласе поэзий конкурсыш йодмашым колташ лиеш. Адрес: Йошкар-Ола, Первомайский урем, 109-ше №-ан пӧрт, 115-ше пӧлем. Телефон: (88362) 45-88-51. Электрон почто: mari-centr@mail.ru.
Оласе поэзий конкурс «Колумб лудмаш» республикысе конкурс кышкарыште 21 майыште Йошкар-Оласе 9-ше №ан школышто (Эшкинин урем, 9а) эрта. Регистраций 9 шагатлан тӱҥалеш. А тӱҥ пайрем 10 шагатлан почылтеш.
Конкурсыш тӱрлӧ ийготан – йочасадыш коштшо, школышто тунемше, студент, туныктышо, пашаче самырыктукым, усталык шӱлышан интеллигенций – ушнен кертыт. Тыге почеламутым лудшо-влакым кок номинацийыште кум ийгот кышкарыште (12 ий марте, 12 гыч 18 марте, 18 гыч кӱшкырак) аклат. Номинаций-влак: сылнымут да сӱрет мастарлык.
Сылнымут мастарлыкым Валентинын Колумбын почеламутшым сылнын лудын ончыктыман. Тыгодым почеламутым марла, рушла, финнла, эстонла да моло йылме дене йоҥгалтараш лиеш.
А жюрим сӱрет мастарлык дене палдараш манын, палемдыме адресыш Колумбын произведенийже-влак почеш сӱретлыме паша-влакым колтыман.
Конкурс поэт Валентин Колумбын усталык поянлыкшым кумдан шараш; йоча ден самырыктукымын каныме пагытыштым йӱла почеш виктарен колташ, нуным поэзий деке шӱмаҥдаш; калыкым мотор тӱням ужаш, аклаш тараш; тӱвыра да шинчымаш тӧнеж-влак коклаште кылым пеҥдымедаш ышталтеш.
«Колумб лудмаш» конкурсын организаторже: Республикысе марий тӱвыра рӱдер.

Добавить комментарий