Мер Каҥаш: Визымше пленум эртен – пӱсӧ йодыш-влакым тарватыме (фото)

28 мартыште Марий Элысе мер-политик рӱдерыште (Йошкар-Ола) Мер Каҥашын визымше пленумжо эртыш. Кок тӱҥ йодышым каҥашышт – Мер Каҥашын еҥже-влакын IX Марий калык Погын деч вара паша лектышышт нерген; Регион-влак кокласе Марий мер толкынын негыз кагазше-влак нерген.

Пленумын пашашкыже РФ Кугыжаныш Думын депутатше Лариса Яковлева, Марий Эл правительствын алмаштышыже, республикысе тӱвыра, печать да калык-влак паша шотышто министр Михаил Васютин, тиде министрын алмаштышыже Галина Ширяева, тӱвыра министерствыштак пӧлкам вуйлатыше Игорь Садовин, Республикысе марий тӱвыра рӱдерым вуйлатыше Валерий Григорьев, верысе журналист-шамыч, Мер Каҥаш шошо сессийын икмыняр делегатше ушнышт.

IMG_7871-.jpg

Верла гыч ойлышо-влак, тӱҥ шотышто, калыкле-тӱвыра автономийым ыштыме нерген палемдышт. Тыгай автономий-влак таче Одо, Киров да Угарман кундемлаште, Татарстаныште, Санкт-Петербугышто улыт. Свердловск велне ышташ документым погат. Пошкырт кундемыште тидым ышташ шонат.

Мер Каҥашын еҥже Анатолий Радыгин Марий Оньыжа пелен посна Эксперт Советым ышташ кӱлмӧ нерген ойлыш. Тыгак тудо Марий Эл ден марий-влак илыме регион-влак коклаште правительстве кӱкшытыштӧ келшымаш документым (соглашений) подписатлаш темлыш.

А Регион-влак кокласе Марий калык мер толкынын негыз кагазше-влакын (Устав, кок ӱшандартыш) проектыштым тӱҥ шотышто келшышылан шотлышт да Марий калыкын X Погынлан тӱрыс ямдылен шукташ, тунам вара пеҥгыдемдаш темлышт.

Пленум годым чонеш логалше эше кок йодышым тарватышт. Тиде кечылаште РФ Кугыжаныш Думын депутатше Лариса Яковлева деке приёмыш Йошкар-Оласе йочасадла гыч марий йылмым туныктышо-влак толыныт. Нуным школ деч ончычсо тӧнежлаште марий йылмым туныктышо-шамычын штатыштым 1 ставке гыч 0,25 ставкыш иземдымаш чот тургыжландара. А вет тыгодым ача-ава-влакат марий йылмым йочаштлан туныктынешт, тӧнежлам вуйлатыше-шамычат нине пашаеҥым арален кодынешт. Теве соцзаказат уло! А молан законжо огеш шукталт?

Вес йодыш – Пошкырт кундем Бирск училищыште марий йылмым туныктышо-влакым ямдылымым чарнынешт: тений тушко абитуриент-влакым огыт нал!

Чыла тидым марий мер пашаеҥ-влак ӧрдыж гыч ончен шоген огыт керт!

Мер Каҥашын визымше пленумжо иктешлалте, тудын резолюцийжым шотыш налын, сомылым умбакыже виктарыман.

IMG_7864-.jpg

IMG_7856-.jpg

IMG_7846-.jpg

IMG_7845-.jpg

IMG_7839-.jpg

Автор: Эльвира Куклина, этножурналист, блоггер. Арслан.

Добавить комментарий