Республикысе Антитеррористический комиссийын заседанийже эртен

Республикысе Антитеррористический комиссийын заседанийыштыже транспортышто да калык шуко лийман моло верлаште терроризм деч аралалтме йодышым тарватеныт. Заседанийым Марий Элын президентше Леонид Маркелов вӱден.

Терроризм ваштареш кучедалме йодышым республикысе кучем органыште эреак эскерен шогымым палемденыт, паша утларак вияҥеш. Тидыже поснак транспортышто эскерыме прибор-влакым вераҥдыма гыч шижалтеш. Изи огыл пашам «Йошкар-Ола» аэропортышто шуктымо. Тушто видеоэскерыше камерым, сигнализаций-влакым да молымат вераҥдыме. Видеокамера-влак Йошкар-Оласе кӱртньыгорно да автовокзаллаштат улыт. Комиссийын председательже Леонид Маркелов эше мом ышташ кӱлмымат ойлен. Тудо икмыняр объектыш утларак кугу кумдыкым авалтыше камерым вераҥдаш, тидлан бюджет гыч оксам ойыраш темлен. Тыгак вокзаллаште еҥ-влакым, нунын сумкаштым тергыше рамкым келыштараш, кажне еҥжак тушко логал ынже керт манын, авырен налаш кӱлмӧ нерген ойлен. Кӱртньыгорно вокзалыште билетым кӧлан ужалымым палаш ик базым ышташ темлыме.

Валерий Очеев

Добавить комментарий