Урал – марийынат шочмо вер

Областьысе правительстве культур пашаеҥ-влакым грант дене пашам ышташ ӱжеш. Ялозанлыкыште тыршыше-шамычат министерстве дене пеҥгыде кылым ыштат гын, ятыр полышым налаш йӧн уло. Туныктымо пашаште кугу полышым Свердловск областьысе правительствым вуйлатышын алмаштышыже, образований министр Ю.Биктуганов пуэн шога. Тудо шкеже марий. Сандене лишыл жапыште Марий Эл дене кылым утларак вияҥдаш кумылжо уло. Марий школ-влаклан книга ден тунемме пособий-шамычым ситарыме йодышым решатлаш куштылгырак лиеш.

Областьысе краеведений тоштерыште шагал чотан калык-влакын йӱлашт, культурышт дене кылдалтше экспонат-шамычлан верым ойыреныт. Кызытеш тушто марийын илышыж дене кылдалтше арвер-влак шагал улыт. Ончыкыжым тиде чырым кораҥдаш пижман.

Тений Финляндий гыч уна-влакым вучена, сандене марий сынна чыла могырымат сайын ончыкталтшаш. Свердловск кундемыште 142 наций, 90 мер организаций улыт. Пашанам эшеат сайын вораҥдарен колтышаш верч Уралысе шагал чотан калык-влак ассоциацийыш ушныман.

«Мари» обществым вуйлатышын алмаштышыже С.Митькин ушемын чоҥалтмыже, кажне районышто, илемыште актив-влаклан мер пашам кузерак виктарен колтышаш нерген ойлен. Ятыр ой-каҥашым Красноуфимск гыч краевед В.Ганькин, Тавра ялысе литератур да краеведений обществын еҥже Л.Урванцев пуэныт. Онаеҥ Б.Александров сылнымут произведенийым возышо урал марий-влакын альманахыштым лукташ темлен. Борис Александровичын шкенжынат тений книгаже Йошкар-Олаште лекшаш. В.Кандыбаев «Мари» обществын шочмо историйже, марий интеллигенцийым шукемдыме, шке радамыш самырык-влакым ушымо нерген ойлен.

«Мари» обществын латкок еҥан паша органжым сайлыме, планым пеҥгыдемдыме. Тений Агавайремым 9 июньышто Красноуфимск районысо Кӱшыл Бугалыш ялыште эртараш палемдыме.

В.Бакетов,
Свердловск кундем  Изи Тавра ял

Добавить комментарий