Звенигово оласе лицейын да 3-шо номеран школын тунемшыже-влак эн келге шинчымашым ончыктеныт

Звенигово районысо школ-влакын тӱҥалтыш класслаштыже тунемше-влак пытартыш кум ийыште олимпиадыште вийым тергат. Икымше гана ик предмет, кокымшо гана кок предмет дене шинчымашым тергыме гын, тений — кум предмет дене, тиде – руш йылме, математика да йырым-йырысе тӱня. Шушаш тунемме ийыште эше ик предметым ешараш шонат.

Олимпиада кум вере эртаралтын. Тыге 33 тунемше Кужмара школышто шинчымашым терген, Звенигово оласе 3-шо номеран школышто — 36, 2-шо номеран Красногорский школышто — 30. Черетан таҥасымаште тыгай сӱрет палдырнен: оласе школ-влак коклаште эн келге шинчымашым Звенигово оласе лицейын да 3-шо номеран школын тунемшыже-влак ончыктеныт, а ялысе школ-шамыч коклаште заданий-влакым эн сайын Мочалище да Чакмарий школын ӱдыр-рвезыже-влак ончыктеныт. Сеҥыше ден призёрлан диплом ден шарнымашан пӧлек деч посна шере призым кучыктеныт.

Валерий Очеев

Добавить комментарий