Марнетын шÿдыржö-влак – 2012

Марий Эл Республикысе тÿвыра, печать да калык-влак паша шотышто министерстве ты темлыме пашам сайлан шотлышо министерстве, ведомство, организаций-влак дене пырля икымше гана марла возышо сайт, портал, блог да Интернет-сообщество-влак коклаште конкурсым эртара.

Министерствын печать да массовый коммуникаций управленийжын увертарымыж почеш, конкурс Марий Элысе да шочмо калыкын тÿшкан илыме кундемласе марий-влак икте-весышт дене илышын тÿрлö йыжыҥжым Интернет гоч келгынрак вашла палдарен кертышт да икте-весышт дене кутыраш сай йöн лийже манын кок ийлан ик гана эртаралтеш.

«Марнетын шÿдыржö-влак» конкурсышто кеч-кушто илыше, кеч-могай гражданстван, тыгодым марий йылме дене Интернет-дневник ден Интернет-сообществым вÿдышö, сайт ден портал-влакым (тыгак нунын иктаж ужашыштым) ыштыше да шуяш полшышо юридический ден физический лица вийыштым терген кертыт. Тыгодым сайтын кушто регистрироватлалтмыжат шотыш ок налалт.

Конкурс икмыняр номинаций дене эрта:

Кугыжаныш кучем органын эн сай сайтше.
Тÿвыра тöнежын эн сай сайтше.
Тунемме тöнежын эн сай сайтше.
Коммерческий организаций ден предприятийын эн сай сайтышт.
Мер организацийын эн сай сайтше.
Марий йылме дене печатлалтше СМИ-н сетьысе эн сай версийже.
Марий калыкын сымыктышыжым, тÿвыражым, историйжым, йылмыжым да йÿлажым ончыктышо эн сай тематике сайт.
Туныктышо эн сай сайт.
Посна авторын эн сай блогшо (Интернет-дневник).
Эн сай Интернет-сообщество.

Конкурсант-влак йодмашым 1 июнь гыч 1 ноябрь марте колтен кертыт. Сеҥышым 2012 ий декабрьыште палемдат.

Конкурсын положенийже нерген Марий Эл Республикысе тÿвыра министерствын сайтыштыже (http://mincult12.ru, «Конкурс-влак» ужашыште) пален налаш лиеш. Тыштак конкурсышто вийжым тергаш шонышо еҥ заявкын формыжым муын кертеш. Лекше йодышым 45-09-63 №-ан телефон дене рашемдыман.

mincult12.ru

Добавить комментарий