Режиссёр-влак каҥашеныт

2-5 мартыште Россий театр пашаеҥ-влак ушем Россий режиссёр-влакын гильдийышт дене пырля Евг.Вахтангов лÿмеш театрыште режиссёр-влакын лабораторийыштым эртарен. Тыште М.Шкетан лÿмеш Марий кугыжаныш драма театрын тÿҥ режиссёржо  Роман Алексееват лийын.

Лабораторийым режиссёр, Россий Кугыжаныш премийын лауреатше, «Золотая маска» Россий театр премийын лауреатше, Е.Вахтангов лÿмеш Кугыжаныш академический театрын художественный вуйлатышыже Римас Туминас вуйлатен.

Р.Алексеевын мутшо почеш, элнан тÿрлö кундемже гыч рÿдолашке погынышо режиссёр-влаклан ныл кече жапыште икмыняр спектакльым ончыктеныт, вара нуным тÿшкан каҥашымаш лийын. «Оҥай ыле Литва театрын «Misters» спектакльжын премьерыже,— ойла Роман Юрьевич.— Тыгак «Ветер в тополях», «Принцесса Ивонна» спектакль-влак келшеныт. Вахтангов лÿмеш театрын художественный вуйлатышыже денат вашлиймаш моткоч сайын да пайдалын эртен. «Актёрын драматургий дене кылдалтшын модмо койышыжо» йодыш дене шуко уым пален налаш лийын».

Москвашке погынышо режиссёр-влак, мутат уке, ваш-ваш пашашт дене палдареныт, моло йодышымат каҥашеныт.

shketan.ru

Добавить комментарий