Уэш – ончычсо паша. Уэш – образований аланыш

Кугыжаныш Думыш Марий Эл деч депутатлан сайлымына деч ончыч Лариса Николаевна Яковлева республикысе образований министрын алмаштышыжлан ыштен. Вара марий ӱдырамаш ныл ийым Кугыжаныш Думышто тыршен. Тений гыч тудо уэш тошто пашашкыжак пӧртылын. Кодшо кечылаште Л.Яковлева мемнан деке унала тольо, вет Лариса Яковлева дене ме, «Кугарня» газетын пашаеҥже-влак, шукертсек ӱшанле йолташ улына.

— Мый министерствыште национальный образований йодышлан вуйын шогем. Кундемыштына марий, татар, одо, чуваш-влак шке йылмыштым тунемыт. Кушто шочмо йылме верч мо ышталтеш, мо ышталтшаш – чыла тидым контрольышто кучена. Шочмо марий йылме верч поснак чон коршта. Ятыр школышто тудым огыт тунем. Тидлан ава-ача шкеак тореш улыт. Йӧра кеч национальный республик улмылан кӧра ме марий йылмым кугыжаныш йылме семын тунемшаш улына. Шочмо йылме деке мелынрак лийман. Тиде йодышым эскеренак шогаш тӱҥалам. Шочмо йылмын кӱлешлыкшым ача-авалан умылтараш кӱлеш, вет таче шукыжым нунын деч шога,- палемдыш Лариса Николаевна да ешарыш:

— Образований да шанче министерстве лишыл жапыште икмыняр у учебникым лукшаш. Кызыт нуно ямдылалтыт. Книга-влакым опытан туныктышо-шамыч возат. Тидлан республикысе бюджет гыч 3 миллионат 900 тӱжем теҥге окса ойыралтын. Ты кечылаште Марий книга савыктыш дене контрактым ыштена. Мутлан, ИКН предметым туныктышо-влаклан кызыт нимогай книга уке. А вашке тудо лиеш.

Тыгак тений апрельыште йоча-влак коклаште «Самырык тукым» конкурс эрта. Апрель-май тылзылаш «Марий йылмым эн сайын туныктышо» конкурс лиеш. Октябрьыште «Этнокультур аланыште эн сай методист», ноябрьыште «Тоштерыште урок» республик кӱкшытан конкурс-шамыч вучат.

Кызыт «Этнокультур аланыште эн сай учебно-методике пособий» конкурс кая. Тудо ноябрь марте шуйна.  Конкурслаште сеҥыше-влакым приз дене палемдаш мылам Партнёр комитетем полшаш тӱҥалеш. Депутат улмем годым погымо ты комитетем пеленемак кодын.

Июльышто Марий самырык тукым слёт лийшаш. Могай районышто да кузе эртарыме нерген кызыт шонена.

Икманаш, паша шуко. Тиддечат шукырак улыт у шонымаш-влак. Нуным илышыш шыҥдараш кумыл гына лийже. А тидыже Лариса Николаевнан ситышын.

Ирина Степанова

Добавить комментарий