Курго ок сите — олыкым нал

Тыгай йӧнлан эҥерташ палемденыт Параньга районышто.

Кодшо ийын ты районышто мыняр кочкыш сатум ыштен налме гын, тышечын 80 процентше шке озанлыкым кучышо-влаклан логалеш. Пытартыш жапыште нунылан кугыжаныш могырым пуымо полыш кугем толеш. Мутлан, 2010 ийыште гына шке озанлыкым кучышо-влаклан 5,7 миллион теҥге полышым пуымо. Тышечын 4,5 миллионжо федеральный бюджет гыч толын гын, 1,2 миллионжо — республикын бюджетше гыч. Ты оксам тӱкан шолдыра вольыкым ашныме пашам вияҥдаш да банкла гыч налме кредитын процент ставкыжын ужашыжым пӧртылташ кучылтмо.

Пытартыш жапыште кургын, поснак вольыклан пукшышаш пырчын, акше чот шергештын. Тыгак шудо, олым огыт сите. Тидым шотыш налын, район администраций ял калыклан шудым ямдылаш, тыгак тудым вольыклан ужаргынек пукшаш ситыше лийже манын, шудылыкым але куралме пасум олыкыш савырышашлан арендыш пуаш пунчалым луктын. Ик гектар мландым арендыш налме кокла ак — талуклан 90 теҥге.

Тидым палемдыман: Медведево да Параньга районлаште мландым пайлан шеледыме огыл. Сандене ял калыклан мландым арендыш налме йӧн ятырлан куштылгырак. Параньга районышто веле огыл, пӱтынь республикыште, ял калыклан кургым ситараш манын, мланде йодышым писынрак рашемдаш палемдыме.

В.Смоленцев

Добавить комментарий