Икте садикыш коштеш, весе мӧҥгыштӧ шинча

Ялысе фельдшер-акушер пунктын пашаштыже ик эн тӱҥ йыжыҥлан йоча-влакын тазалыкыштым эскерен шогымаш шотлалтеш. Оршанка районысо Тошто Крешын ФАП-ын медикше-влакат тидлан поснак кугу тӱткышым ойырат. Нуно  школышто тунемше, йоча садыш коштшо ӱдыр-рвезе-влакын кузе шуаралт кушмыштым эреак эскерат, нунын деке чӱчкыдынак миен савырнат.

— Йоча садысе группышто коло икшыве шотлалтеш, — ойла ФАП вуйлатыше Л.Рыбакова. — А ялыште садикыш коштшаш ийготан-влакше кок пачаш шукынрак улыт. Чылаштлан вер огеш сите. Йӧра, иктыштын мӧҥгыштӧ ончышышт улыт. Но чыланыштын тыгай йӧнышт уке. Южо ача-ава шочшыштым Кугунур садикыш коштыкта. Йоча садыште улшо икшыве-влакын тазалыкыштым эскераш йӧнанрак. Мӧҥгыштӧ шинчыше-влакшым черланымеке веле мемнан деке кондат. Но ме акушерка Майя Иванова дене ешлашкат чӱчкыдынак лектын коштына.

Фельдшер-акушер пунктын медикше-влаклан йоча-влакын тазалыкышт верч телым поснак тургыжланаш пернен. Тыштат пӱтынь  республикысе семынак пӱсӧ респираторный вирусан чер да грипп дене черланыше-влак шагалынжак огыл лийыныт. Йӧра, тунемше да садикыш коштшо-влаклан жапыштыже грипп деч прививкым ыштен шуктымо. Тудо вирус деч мыняр-гынат аралалташ да черын нелеммыж деч утлаш полшен.

Людмила Иванова

Снимкыште:  изи йоча-влаклан садикыш кошташ келша; Тошто Крешын ФАП-ым вуйлатыше Л.Рыбакова Г.Рыбакован давленийжым виса

М.Скобелевын фотожо

Добавить комментарий