Йомак тӱняшкат пуртеныт

Шуматкечын, 12 мартыште, Сеҥымашын ХХХ идалыкше лӱмеш тӱвыра полатыш погонан ден погондымо еҥ-влак шыҥ-шыҥ погыненыт.

Амалже? Российысе Уголовно-исполнительный система кечын ФСИН-ын Марий Элысе управленийже «Миссис УИС» конкурсым эртарен.

Участница-влак эн ончычак шке пашашт нерген каласкаленыт, кажныж дене палдарыше видеоклип конкурс лийын. Тылеч вара сценыш нунын икшывышт лектыныт. Нуно, нимынярат вожыл шогыде, почеламутым лудыныт, муреныт, куштеныт. Ӱдыр-эрге-влакым адакат авашт алмаштеныт. Ынде нунат кажныже мурым муреныт. Умбакыже чыланат – ӱдырамаш-влак ден ончышо-шамычат – йомак тӱняш «кусненыт». Тидым ышташ Чеширский Пырыс ден Шляпник полшеныт. Ты конкурсышто кажне еш, сӧрал деч сӧрал вургемым чиен, йомакла гыч персонаж-влакым модын ончыктен. Тидыжак конкурсышто ик эн ойыртемалтше ужаш лийын.

Жюри член-влаклан, а тудым республикысе тӱвыра, печать да национальность паша шотышто министрын икымше алмаштышыже В.Актанаев вуйлатен, эн сайжым ойырен налаш путырак неле лийын. Туге гынат нуно теве могай иктешлымашым ыштеныт: «Вице-миссис» лӱм дене республикысе ФСИН-ын секретариатшын начальникше Марина Опалева палемдалтын. А «Миссис УИС-2011» титулым 6-шо номеран колонийын пашаеҥже, внутренний служба сержант Юлия Жданова сеҥен налын. Пӧлек шотеш ӱдырамаш-влаклан ЖК-телевизорым кучыктеныт. Интернет-йӱклымаштат эн шуко, 8 тӱжем утла, йӱкым Ю.Ждановак поген. «Ончышо-влакын симпатийышт» номинацийыште 1-ше номеран МРУИИ-н пашаеҥже Лариса Данилова сеҥен. Моло ӱдырамаш-влакымат тӱрлӧ лӱм дене палемдыде да пӧлек деч посна коден огытыл. Конкурсым эртарыше-влак нунылан полшышо икшывышт-влакланат МР3-плеерым пӧлекленыт.

Л.Камалетдинова

А.Канатеевын фотожо

Добавить комментарий