Ийым тергат

Марий Турек посёлкышто шукерте огыл почылтшо Ий полат яра огеш шинче. Кызыт тыште Марий Элым вуйлатышын призшым сеҥен налме верч хоккей турнир тӱҥалын. Марий Эл да Киров область гыч хоккейын ветеранже-влак 6 командым погеныт да шке коклаштышт икымше модмаш-влакым эртареныт. Нуным кок тӱшкалан шелыныт. Икымшыште – Марий Турек гыч «Восток», Киров область гыч «Лебяжье» да Пижанка» команде-влак. Кокымшо тӱшкаште – Параньгасе «Зенит», Морко гыч «Газовик» да Киров область Советск олан командыже. 12 ноябрьыште икымше матч-влак лийыныт. «Лебяжье» «Пижанкым» 5:3 счёт дене сеҥен ыле, но Марий Турек «Востоклан» 4:15 счёт дене модын колтен. Киров область Советск олан командыже Морко гыч «Газовикым» 7:1 счёт дене сеҥен. Вес модмаш-влак 20 ноябрьыште лийыт.

Добавить комментарий