Шыже сем шергылтеш

У Торъял районысо тӱвыра пашаеҥ-влак пеш оҥай фестивальым эртареныт. Тудо «Торъял шыже» маналтын да марий ден руш эстрадный, марий калык мурым мурымаш конкурс семын эртен. Усталык ӱчашымашке 20 мурызо ден 5 фольклор ансамбль ушнен. Такмак ден марий калык мурым мурышо-влак коклаште Токтарсола гыч Анатолий Лихачёв, Тошто Торъял гыч Галина Садовина да Немда гыч Зинаида Лебедева сеҥеныт. Вокальный коллектив-влак коклаште районысо «Торъял кундем» ансамбльым, Немда клуб гыч «Эрвийым» да Кузнеч клуб гыч Келшымаш» ансамбльым палемдыме. Чыла сеҥыше-влаклан диплом ден пӧлекым пуымо.

Куженер районыштат тыгаяк фестиваль-конкурс лийын. «Шыже сем» конкурсышто 9 мурызо шке вийжым терген. Нуно кажныже кок муро гыч муреныт. Ончаш толшо-влакын призыштым Шӱдымарий гыч Андрей Нефонтовлан пуымо, Старсела гыч Елена Шибанаева фестивальын лауреатше лӱмым сеҥен налын.

Добавить комментарий