Влад Николав да «Август RUSH»

17 ноябрьыште 18 шагатат 30 минутлан Самырык-влакын полатыштышт (ончычсо Калинин  лӱмеш тӱвыра полат) Олык Ипай лӱмеш кугыжаныш премийын лауреатше Влад Николаевын да «Август RUSH» группын концертышт лиеш.

Шижалтеш, мурызо Влад Николаев тӱвыра илыш деч огеш кораҥ, а утыр да утыр калык коклаште шке программыж дене лиеда. Тений шошо гыч таче марте йӧршын канен огыл: ӧрдыж кундемыште илыше марий родына-влак деке ты группо концерт дене лектеден. Тыгак Влад ик эн ойыртемалтше командым чумырен. Палыме артист Василий Пектеев, мурызо-влак Галина Козырева, Виктор Комаров да Влад Николаев  шкежат, Пошкырт кундем гыч тӱҥалын, Урал марте миен шуыныт. Калыкын сайын да весела кумыл дене вашлиймыже мурызын чонжым тачат вӱчка, каласкалымыж годым шинчаже куан дене темеш. «Шонымаш уло икмыняр группым погаш да калыкыш лукташ. Кызыт И.Палантай лӱмеш тӱвыра ден сымыктыш колледжыште пашам ыштем. «Ухо» студийым вуйлатыше Ренарт Газизов – группын продюсерже. Кандаш еҥан состав марий да руш муро-влакым йоҥгалтара.

Ты группо дене чыла районысо рӱдӧ тӱвыра полатыш лекташ шонымаш уло. Шке йӱк дене мурымаш (фонограмме деч посна) да семӱзгар дене шоктымаш кызыт моткоч кӱлешан улыт, эстраде сем калыкын шержым темен.

Марий Эл радиошто йоҥгалтше муро-влакым колыштамат,  критик семын огыл, а темлымаш шот дене тыге ойлем: профессионал ден самодеятельность коклаште ойыртем лийшаш, артист-влак йомшаш огытыл. Сыраш огыл, а шотыш налаш кӱлеш, шонем. Сцене самырык еҥым йӧрата:  у мурым, койышым, кап-кылым йодеш. «Тынар ий мурет, палыме улат, сулло лӱмым кунам налат?» – йодыт. А мыйже мом вашештышаш улам?  Шыргыжалын, «Тудыжым вет кевытыште огыт ужале манын пелештем», – ойла В.Николаев.

«Российысе южо артист семын кочкыш шотышто от васартыл?» йодмемлан Влад угыч весела койышыжым ыш шылте. Фен-шуйым шымлаш тӱҥалынам. Оҥай. Ушан ойым пуа. Палет, киндым кочмым чарненам. Уке гын, мӱшкыр кушкаш тӱҥалын, палымем-влак, койдарен, тӱрлым воштылыт ыле. Теве угыч чаткалык палдырна. Кочкышым ом васартыл, пелашемланат кумылын ямдылаш полшем. Ешем пеш «пиалан» – мыйым идалыкыште улыжат ик-кок тылзе ужеш. Кочкаш шолташ ок кӱл, вӱр йӱшӧ уке, сай, шонем», – палдарыш Влад Николаев.  А ешыжым тудо моткочак йӧрата.

Тудын Илея ӱдыржӧ спорт деке шӱман. А эргыже латкандаш ияш. Пӱрӧ оласе вузышто физмат пӧлкаште тунемеш. Тений унала Марий Элыш толын каен. Ачаж дене коктын Йошкар-Олан сӧраллыкшым ончал савырненыт.

Теве тыгайрак артистын илышыже. Мегаполис дене от таҥастаре. Тыште марий еҥ гаяк эре тыршыман, пашам ыштыман. Улмет годым таужымат шагал колат. Кеч-мо гынат, Владислав Николаевын кажне мурыжо чоныш шыҥа, шке гыч шонымо семже мастарлыкшым почын  пуа.

Йолташ-влак, Влад Николаевын усталык касышкыже каяшак кӱлеш. Тудын муралтымыжым колыштын, мый гын иктым умылем: марий тӱвыраште яндарлык аралалт кодеш.

Татьяна Пчёлкина

Добавить комментарий