Марий Элысе спортсмен-влак V Российысе теле ялысе модмашыш каят

«Марий Эл» ий полатыште капкультур, спорт да туризм министр Владимир Чумаков республикын сборный командыж дене вашлийын. Нине спортсмен-влак V Российысе теле ялысе модмашыш каят. 25 спортсмен Медведево, Советский да Морко район гыч улыт. Нуно спортын 8 видше дене вийым тергат.

Спортивный еш-влак коклаште Марий Элын чапшым Сергеевмыт аралаш тӱҥалыт. Наталья Лисицына, Екатерина Сергеева, Семён Очеев да Андрей Яндыбаев ечыгорныш лектыт. Ольга да Евгения Бородинамыт доярке мастарлыкыштым ончыктат. Шахмат дене модыт Александр Смирнов, Анастасия Смирнова да Сергей Руштанов; шашке дене – Сергей Семёнов, Александр Семёнов да Людмила Малтакова. Кирам нӧлташ тӱҥалыт Владимир ден Александр Веденеевмыт, Татьяна Сенгина да Екатерина Игнатьева. Механизатор-влак таҥасымашке ушнат Александр ден Юрий Таныгинмыт, полиатлонышто лийыт Александр Галкин, Александр Кузьмин, Наталья Пайгишева да Светлана Майшанова. Тылеч посна республикын делегацийыштыже улыт Геннадий Белоусов, Сергей Кугергин, Виталий Воронцов да Александр Булдаков.

Телым ялысе модмаш тений Омск областьысе Красноярка селаште эрта. Российын 49 регионжо гыч тӱжем утла спортсмен погына. Таҥасымаш-влак 17 мартыште тӱҥалыт да 21 мартыште мучашлалтыт. Официальный почмаште Российын спорт, туризм да молодёжный политике шотышто министрже Виталий Мутком да ял озанлык министр Елена Скрынникым вучат.

Валерий Очеев

Добавить комментарий