Премий верч виян деч виян-влак таҥасат

Марий Эл Республикым вуйлатыше пелен Марий Эл Республикын Литератур, искусство, архитектур, науко да техник шотышто кугыжаныш премийже шотышто комиссий 2010-2011 ийлан Марий Эл Республикын Литератур, искусство, архитектур, науко да техник шотышто кугыжаныш премийжым пуышашлан конкурсыш налме произведений ден паша-влак коклашке Марий Эл Радион икмыняр концертше пурталтын.

Александр Курмузаковым (пашам вуйлатыше), Наталья Пушкинам (сценарист-режиссёр), Ирина Якаевам (музыкальный вуйлатыше) 2010-2011 ийласе «Пеледыш пайрем – 2010», «5 ий Марий Эл Радио дене пырля», «Йӧратымаш – тиде Тый да Мый» тематический музыкально-развлекательный концерт диск-шамычлан претендент семын палемдыме да пашаштым каҥашымашке лукмо.

Наташа Пушкинан мутшо почеш, конкурсыш ушнаш Мер Каҥаш темлен. Формат шот дене концерт-влак тӱрлӧ улыт. Декораций, сцене, оригинальный сценарийышт дене тӱжем дене ончаш толшо еҥым куандарат. Теве налаш Радион кудымшо идалыкшылан пӧлеклалтше кеҥежымсе концертым. «Дружба» стадионышко 5 тӱжем еҥ толын, эше 2 тӱжемже пурен кертын огыл. Билетым ончычак ужален пытарыме.

Йӧратымаш кечылан пӧлеклалтше «Йӧратымаш – тиде Тый да Мый» концертым специалист-влак кӱкшын акленыт, мюзикл дене тӧр шынденыт.

Тылеч посна Марий Эл Радио у проект-влак дене районлаш лектын коштеш. Олаште ик сценарий почеш пашам ыштат гын, ялласе калыклан вес программым ончыктат. А вес кундемлаште илыше марий калыкым чапле дискышт дене куандарат. Нунылан кажне гана концертым ончаш огеш логал гын, мӧҥгыштышт дискым чӱктен ончен шинчат.

«Концертым эртарен колтымешке чот ярналтеш, туге гынат, изиш канымек, у деч у, оҥай деч оҥай шонымаш-влак вуйышто пӧрдаш тӱҥалыт. Кызытат у проект нерген шонкалена. «Марий Эл» кугыжаныш ансамбль дене пырля пашам ышташ кумыл уло, пеҥгыде кылым ыштена манын ӱшанена», – ойла радион тӱҥ редакторжо Наташа Пушкина.

Кугыжаныш премий верч виян деч виян-влак таҥасат. Нунын паша лектышыштым ме чыланат сайын ужына. Кудо претендентше вара сеҥышыш лекшаш? Пагалыме лудшына-влак, Марий Эл Радион пашаж нерген мом шонымыдам, могай акым пуымыдам палыме шуэш. Радио пашаеҥ-влак тендак акдам вучаш тӱҥалыт.

Шке шонымашдам 63-03-81 телефон номер дене йыҥгыртен але Йошкар-Ола, СССР Вооруженный Вийын 70-ше идалыкше урем, 20-шо №-ан пӧрт (Марий Эл Радио) адрес дене толын (серышым возен) кертыда.

Вера Гордеева

Добавить комментарий