Шке нерген увертарыман

Октябрьыште республик мучко пачер оза-влак газлан тӱлымо квитанций дене пырля эше ик кагазым налыныт. Бланкыште персональный данный-влакым пуаш келшыме нерген ойлалтеш. Молан тыгай кагазше кӱлеш? Газовик-влак тыге умылтарат: шукерте огыл «О защите персональных данных» законыш вашталтышым пуртымо. Тудын почеш, иктаж-могай услугым пуышо организаций ден еҥ коклаште эше ик учреждений лектеш гын, граждан-влак шкешт нерген данныйым пуаш вашкылым ыштышаш улыт.

Кызыт «Межрегионгаз» ден абонент коклаште вашкыл уло, но ме квитанций почеш оксам банкыште але почтышто тӱлена. Сандене ончыкыжым почто пашаеҥ-влак квитанцийым жапыштыже кондышт да банкыште мемнан деч оксам налышт манын, шкенан нерген данныйым пуышаш улына. Кӧ тыге ышташ тореш лиеш гын, тудо кажне тылзын газовик-влак деке шкеже мийышаш да кучылтмо газлан оксам тӱлышаш.

Марий Элыште газ дене пайдаланыше 205 тӱжем 940 абонент шотлалтеш. Шукынжо тыгай кагазым налыныт, лишыл жапыште Медведево районышто, Волжскышто, Звенигово ден Козьмодемьянскыште илыше 20 тӱжем наре абонент деке миен шушаш. Уто пашам ыштылаш огыл манын, кагазым кидпалым пыштыман да газовик-влаклан колтыман.

Добавить комментарий