Справкет уло – айдеме лият

Ончыкыжым мыланна иктаж-могай кугыжан учрежденийыш мийыме деч ончыч тӱрлӧ справкым шагалрак погыман. 1 октябрь гыч «Кугыжаныш да муниципальный услугым пуымо пашам шотыш кондымо шотышто» законын ик эн кӱлешан пунктшо илышыш пурен. Тудын почеш, республикыштына федеральный ведомство-влак шке коклаштышт сай вашкылым ыштышаш улыт. Тиде – налог службо, казанчейство, Росреестр, миграционный службо да Пенсионный фонд. Вуйлатышышт мемнам тыге ӱшандарат: иктаж-могай йодмаш дене мийыме годым нуно уто справкым, иктаж-могай документын копийжым йодаш огыт тӱҥал.
Мутлан, ондак иктаж-могай погылан правам регистрироватлыме годым бизнесмен-влак деч налог службышто налме выпискым йодыныт. Ончыкыжым регистратор-влак чыла справкым шкештак кычалыш тӱҥалыт. Роспотребнадзорат шкенжым кум услугыжым у семын пуаш ямдылалтеш: ынде тушто йодмашым гына возен кодыман, молыжым специалист-влак шкештак чумырат. Ондак эн чот неле ыле пропискым ышташ, вет тушто шуко тӱрлӧ справкым йодыныт. 1 октябрь гыч тыштат вашталтыш лийшаш. Ончалына, кузерак нуно мемнам илышнам куштылемдат?!

Добавить комментарий