Калык кузе ила – «доход» ужаш ончыкта

Кужеҥер район администрацийыште ял шотан илем вуйлатыше-влак дене эртарыме кажне погынымаш бюджетын доход ужашыжым кузе шуктымо йодыш дене тӱҥалеш. Кодшо вашлиймашыште финанс пӧлка вуйлатышын алмаштышыже Галина Кальсина тидын шотышто могайрак сӱрет нерген ойлен.

Налог да налог огыл семын бюджетыш пурышо доход ял шотан илемлаште тӱрлӧ кугытан. Теве Шорсола велне идалыкаш планын 88 процентшым теменыт, Токтайбелякыште 75 процентыш шуктеныт, Салтакъял могырым 70 процентым эртеныт. Тиде жапыштак Тумньымучаш, Руш Шой да Йӱледӱр велне идалыкаш планын пелышкыжат шуын огытыл. Эксперт-влак тидын шотышто иктым гына ойлат: тугеже тиде кундемлаште калыкын ыштен налме доходшо изи, тыгак предприятий-влакат кӱлеш семын огыт ыште.

Добавить комментарий