Ӱдырамаш-влак утларак илат

Советский районышто таче кечылан ийгот шот дене пенсийым налше 5748 еҥ шотлалтеш. Нунын кокла гыч эн илалшыже – Роҥго селаште илыше Прасковья Анцыгина. Тений 25 октябрьыште тудлан 98 ий темеш.

Прасковья Ивановна Шнаран селаште 1913 ийыште шочын, лу ияшак тулыкеш кодын – ик арня жапыште коваже, ача-аваже коленыт. Ӱдырым кокаже ашнаш налын. Пел ӱмыржым колхозышто пашам ыштен, а пенсий марте коло ий наре Роҥго школышто техслужащийлан тыршен. Неле-йӧсым сеҥенак лектын. Нина ӱдыржӧ ден коктынак пӧртым нӧлтеныт. Тыгай пеҥгыде улмыжланак кӧра тудым ӱдыржӧ да веҥыже пагалат, кум уныкаже да кум кугезе уныкаже кажне кечын куандарат.

Волжский районыштат 90 ийым темыше да эртыше-влак ятыр погынат. Таче кечылан 35 еҥ шотлалтеш. Но нунын коклаште ик пӧръеҥат уке. Тидыжым умылаш лиеш, вет статистик-влакын эскерымышт почеш, Марий Элыште пӧръеҥ-влакын илен шумо кокла ийготышт 60 ийышкат огеш шу. 70-80 ийым эртыше-влакше икмыняр лу еҥ уло гын, индешлу ияшым шотлаш парня-влакат ситат.

Добавить комментарий