Университетын илышыже поян

Марий кугыжаныш университет гыч увертарат. Тыште икымше курсышто тунемше студент-влакын шыже марафонышт тӱҥалын. Тудо «Голос юности» маналтеш да республикысе кӱшыл педагогический образованийын 80 ияш лӱмгечыжлан пӧлеклалтеш. 3 октябрь гыч кажне кечын 14 факульт да 4 институт шке программыжым ончаш темла.

Сеҥыше-влакым жюри 10 номинацийыште палемда. Фествиальым физико-математический факультет почеш, вара сценыш технологий да профессиональный образований факультет лектеш.

Тиде университетынак финноугроведений институтыштыжо профессор Иван Степанович Галкин лӱмеш финн-угор филологий кабинетым почыныт. Иван Степанович Галкин – финн-угор тӱняште кумдан палыме шанчызе, филологий наука доктор. Тудо университетым почмо гычак пашам ышташ тӱҥалын, да пытартыш кече марте тыште тыршен. Ӱмыржӧ 2010 ийыште кӱрылтын.

Финно-угроведений институтыштак студент-влак коклаште олимпиадым эртараш ямдылалтыт. Тыште Россий калык-влакын йылмышт да сылнымутышт дене шинчымашым тергаш тӱҥалыт. Олимпиада 5 октябрьыште почылтеш, сеҥыше-влак 10 октябрьыште пале лийыт. Оргкомитетын ойырен налме 3 еҥ Россий кӱкшытан олимпиадыш кая. Тудо Ижевскыште лиеш.

Добавить комментарий