Тергыше-влак оксам аныклаш полшат

Тӱрлӧ тергыше-влак коклашке эше ик тӱшка ешаралтын. Тиде – энергоаудитор-влак. Нунын Марий Элысе филиалже 11 тӱрлӧ организацийым ушен шога. Аудитор-влак илыме верын, административный зданийын да промышленный объект-влакын энергийым аныклымыштым аклаш тӱҥалыт.

Илыме пӧрт-влакым налаш гын, республик мучко шуко пачеран 37 пӧртым тергат. Тыгай пашан сайже шуко уло, мутлан, пачер оза-влаклан коммунальный услугылан тӱлымӧ оксам аныклаш полша. Ӱмаште телым игечын могай улмыжым аклыше датчиклан кӧра Медведево посёлкышто Терешкова уремыште ик пӧртыштӧ илыше-влак моло дене таҥастарымаште ик тылзыште гына 10 тӱжем теҥгелан шагалрак тӱленыт. Тергымаш пашажат шулдак огыл, ик пӧртлан 30 тӱжем теҥге кӱлеш. Но тиде окса садак шкенжым сула.

Добавить комментарий