Пӧтъялыште тӱвыра рӱдер лиеш

Пӧтъял ял шотан илем Волжский районышто эн кугулан шотлалтеш. 2006-шо ийыште тыште кум администрацийым иктыш ушеныт. Ынде тудо 18 ялым авалта. Но администрацийын посна верже, а тысе калыклан тӱвыра рӱдер але марте лийын огыл.

Сандене посна вер кӱлмӧ нерген йодыш пӱсын шоген. Тений тудо рашемдалтшаш. Ялыште чоҥен пытарыдыме ик объектым шошым республикысе «Адресан инвестиций программыш» пуртеныт. Кызыт тыште Волжск ПМК-ан пашаенже-влак тыршат. Тыгак оласе профессиональный лицейын Пӧтъялыште верланыше филиалыштыже тунемше рвезе-влак полышкалат. 700 утла квадрат метр кумдыкышто иканаште икмыняр социал объект верлана. У тӱвыра рӱдерыште связь отделений, библиотеке, участковыйын кабинетше, верысе частный озанлыкын правленийже, 50 шичме веран актовый зал, верысе администраций верланат. Ончыкыжым йоча-влак шукемыт гын, вер ситыдымаш йодыш лекшаш огыл. Вет администраций да почто у рӱдерыш куснат гын, школышто нунын верышт ярса.

Добавить комментарий