Сай проектым — илышыш

Республик мучко тӱрлӧ проект-влакым каҥашат. Звенигово районышто 9 инвестиционный пашам акленыт. Нуным тӱшка озанлык ден предприниматель-влак ямдыленыт. Эн сай проектлан тугай паша-влакым шотлымо, куштыжо у пашаверым почмылан да районым вияҥдымашлан тӱҥ верым ойырымо.

Район кӱкшытыштӧ 3 проект сеҥен. «Рассвет» агрофирме ял озанлык производствым вияҥдыме пашам луктын. Предприниматель Багаутдинова «Приют кочевника» экологий комплексым чоҥаш шона, а «Зеберс» ушем 50 тӱжем вуй кроликым ашнаш комплексым чоҥынеже. Нине кум проектым республик кӱкшытыштӧ эртышаш конкурсыш темлыме.

* * *

А Медведево районышто каҥашымашке 11 проектым луктыныт. Тыште утларакше туныктымо да тӱвыра учреждений-влак лийыныт. Но «Медведевский водоканал» предприятият шке вийжым терген ончен. Тудо Шойбулак посёлкышто вӱдым эрыктыме станцийым чоҥымо проект дене лектын ыле. Чыла пашам аклыме деч вара комиссий эн сайлан тӱвыра пӧлкан «Янлык театрым чоҥымаш» проектшым шотлен. Тудак районын чапшым республикысе конкурсышто аралаш тӱҥалеш.

* * *

Оршанке районыштат тӱвыра пӧлкан проектше сеҥен. Тӱвыра пашаеҥ-влак районышто 2011 гыч 2016 ий марте туризмым вияҥден колташ окса полышым йодыт. Тылеч посна тыгай проект-влакым каҥашеныт: 94 веран йочасадым чоҥымаш, пырчым коштымо комплексым нӧлтымаш да шӱрашым ыштыме цехым почмаш. Тыгак пӱртӱс газым пуртымо проектат лийын ыле.

Добавить комментарий