Сайлымаш деч вара шонкалымаш

Альберт Васильев

Кавасе шӱдырым ом пайле –
Сандалык илыже ласкан.
Шӱдымыда почеш шым сайле,
Шым вӱчкӧ туп гычын маскам.

Монден кушечын лекмыдажым
Кычкырышда, шӱведышда.
Еҥ вуйым лавыртыл кашта гыч
Кузе рӱжге кыдетлышда!

Кид ден лупшедыл икте-весым
Ӱстел воктек кузе нушда!
Озан пайрем деч кодшо чесым
Кузе вара тавалышда!

А мый гын кодшо курикалан
Тунемын омыл кержалташ.
Могай чон дене уныкамын
Эрласе кечыжым каргаш?

А те, кӧн кумылжо кашташте,
Ончалза ынде, маскада
Кузе ик сакыр падырашлан
Рӱзалын шынчыржым кушта.

19 март 2008 ий
Ронго села

Добавить комментарий