Марий гастарбайберын гимнже

Альберт Васильев

Кылды-голт, кылде-голт,
Кылды-голт, кылде-голт,
Наҥгая мыйым поезд Москошко.
Кылды-голт, кылде-голт,
Кылды-голт, кылде-голт,
Ах, могай тудын мурыжо тошто.

Мый оксам тӱленам,
Мый Москош кудалам,
Кеч ок вучо нигӧ мыйым тушто.
Нигӧат, умылем,
Ок кудал унала.
Шем нужналык покта мемнам тушко.

Кумырлан, шымырлан,
Ужален шӱм-чоннам
Ӱштына ме уремым Москошто.
Кумырлан, шымырлан,
Ужален намыснам
Ваштареш пелештен она мошто.

Кумырлан, шымырлан,
Куанен, йывыртен
Таушташ тӧралан она вожыл.
Кумыр ден, шымыр ден
Пашанажым аклен
Тӧранаже коштеш мемнам воштыл.

Кылды-голт, кылде-голт,
Кылды-голт, кылде-голт,
Кудалеш поездна Марий Элыш.
Кылды-голт, кылде-голт,
Кылды-голт, кылде-голт,
Пӧртылам мӧҥгышкем, нужна элыш.

29 январь 2008 ий
Ронго села

Добавить комментарий