Пытартыш тунемше

Владимир Иванов

Икымше сентябрь. Шыже шӱлыш.
У тетрадь, у ручка, у дневник.
Ял покшечын корно дене школыш
Ошкылеш пытартыш ученик.

Коло суртлан таче ик тунемше,
Мом ойлаш, моткоч шоҥгемын ял.
Йӧршын мо тыге пыта уремже?
Ончемат, йомеш капем гыч ал.

Рвезе йӱкым школышто монденыт.
А тидлан пеш шуко жап эртен:
Кумло дене йоча-влак шинченыт
Парт коклаште кидым кӱш нӧлтен.

Мый алят шарнем раш ик урокым,
Кумло ий гыч омешат ужам,
Кузерак ик кечыште кум «двойкым»
Марий йылме дене налынам.

Кеч тачат тыматле, чон гыч лекше
У почеламутым мый возем,
Со тугак, тугак улам тунемше,
Шочмо йылмым со тугак шымлем.

Уждымо сӱрет, тыгай у илыш,
У тетрадь, у ручка, у дневник…
Ял покшечын корно дене школыш
Ошкылеш пытартыш ученик…

Добавить комментарий