Вуйшийме серыш

Владимир Иванов

Салам, салам, Владимир Путин,
Кугу Российын кугыжа!
Вот тыланда Иван Милютин,
Тендан ӱшанле кул, воза.

Моткоч кугу тендан дек сомыл,
Тендам гына чот пагалем.
Садлан Москваш, Чарлашке огыл
Мый тиде серышым колтем.

Те улыда пилот, подводник,
Поэт, учёный, дипломат…
Я дзюдоист, я горнолыжник –
Тендам чыла вере аклат.

Нимат ойлаш ок лий эсогыл,
Чылан палат, юмат еша*,
Вет президент мылам вел огыл,
А чумыр калыклан келша.

Каласкалат: тендан Москваште
Руш калык сайын пеш ила,
А Марий Элыште, яллаште,
Кресаньык ладыныш шӱла.

Тугак ила оласе калык,
Завод ден фабрика шогат.
Оксам вучат уже идалык,
А пашадар уке тачат.

Ӱшанымашна йомо. Эртыш
«Вич шӱдӧ кече», лу ият.
Уже пура вес курым пӧртыш,
А илыш неле со тугак.

Кеч сар уке гынат, но тыште
Огеш лий эрыкын шӱлаш,
Мемнан тыгай нужна элнаште
Кузе умбакыже илаш?

А вет нужнан илат пеш шукын.
Тендан деч калыкна йодеш
Толаш мемнан деке, уке гын
Шӧргам гына чияш кодеш.

Руш кугыжа, Владимир Путин,
Те улыда пытартыш тул.
Кумал кодам. Иван Милютин.
Тендан марий ӱшанле кул.

*Юмат еша – юмончылно, товатат.

Иванов В.А.
Чонем тугак пӱртӱсышкӧ ӱжеш.:Почеламут-влак.-Йошкар-Ола, 2004.-72с.

Добавить комментарий