Кушто таче мый илем?

Владимир Иванов

Шымленам элем ситале,
Тӱрлӧ калыкым палем.
Иктым веле раш ом пале,
Кушто таче мый илем.

Шочмо ял чот суасемын,
Садланат лӱмдат – агул.
А ола моткоч рушемын.
Мом ышташ, а? – Караул!

У суас-влак у мечетым
У пазар пелен чоҥат.
У марий-влак шке йочаштым
Марла тунемаш чарат.

Нунын але уло капышт,
Уло лӱмышт руш гаяк,
А лӱмнерышт йомын, чапышт
Шарнымаш дене пырляк.

Лач тугак йӱлана йомын,
Черке таче пуйто бар.
Юмылтет: «О, Кугу Юмо!»,
Йоҥгалтеш: «Аллах, акбар!»

Мый палем, тетла ок пӧртыл
Тошто илыш, тошто сем.
Президентым веле огыл,
Шкемымат тидлан вурсем.

А шинчам ончен ойлат гын:
«Тый, Волой, улат нацист!»
Вашештем, тушкен мандатым:
«Мый улам у коммунист!»

«Кушто таче мый илем?» (mp3)

Добавить комментарий